Ekitaldiak
EBAKUNTZEN BIDEOAK
Euskal urologoek egindako ebakuntza nabarmenen bideoak
Euskal Urologia Elkarteko estatutuak
I. ATALA. DEFINIZIOA
1. artikulua Euskal Urologia Elkartea izena hartu eta ELKARTEA eratu zen indarrean zeuden legeen babespean (otsailaren 12ko 3-1988 Legea), Bilbon, 1994ko apirilaren 14an.
Elkartea arautuko dute aipatutako Elkarteei buruzko Legeak ezarritakoak, Estatutu hauek (legearen aurka ez badaude), gobernu-organoek egindako akordioek (Legearen edota Estatutuen aurka ez badaude), eta Eusko Jaurlaritzak onartutako araudi-xedapenek, osagarriak bakarrik izan ahal direnek.
2. artikulua Bere jardueren lurraldea izango da Arabako, Gipuzkoako eta Bizkaiko Lurralde historikoak, Euskal Autonomia Erkidegoa osatzen dutenak.
3. artikulua Euskal Urologia Elkarteko helbidea hasieran eta behin-behinean Bizkaiko Sendagileen Elkarteko Egoitza Soziala da: Lersundi kalea 9, Bilbo.
4 artikulua Euskal Urologia Elkartea behin betiko eratu da, eta bakarrik desegingo da baldin eta Ohiz Kanpoko Batzar Nagusiak hala onartzen badu, VI. Atalean xedatutakoaren arabera; edo Legeek aurreikusitako edozein arrazoi dela eta.
II. ATALA HELBURUAK
5. artikulua Euskal Urologia Elkartea izaera zientifikoko elkartea da, irabazi asmorik gabea, eta bere helburu nagusia da gure lurraldean, Euskadin, Urologia-espezialitatearen bilakaera babestu, sustatu eta zehaztea. Jarduera hauek egingo ditu helburu hori betetzeko:
- Urologia-espezialista guztiak elkartuko ditu, eta urologian interesa edo lotura duten Medizina eta Kirurgia Lizentziatuak, eta kide izateko eskatu duten Osasun Zientzietako beste arlo batzuetako Lizentziatuak ere bai.
- Espezialitatean jarduteko arau deontologikoak, batez ere gaixoaren onuraren aldekoak, betetzen direla zainduko du.
- Espezialitateari lotutako Medikuntza-lanbidearen interes orokorrak sustatuko ditu.
- Urologia irakasteko prestakuntza eta programazioa sustatuko ditu, eta horretarako elkarlanean jardungo du
- Urologiari buruzko aholkularitza emango die Erakunde Publikoei eta Erakunde eta Instituzio pribatuei.
- Espezialitateko ikasketetan sakontzeko Bekak eta Diru-laguntzak sortzea sustatuko du.
- Elkarteko kideen arteko harreman profesionalak sustatuko ditu, bai kideen senidetasuna lantzeko, bai Urologiako Zerbitzuetako prozedura berrien eta aurrerapen teknikoen ezagutza eta trukea bultzatzeko.
- Espainiako Urologia Elkartearekin harremanak eratu eta suspertuko ditu, eta Espainiako Estatuan eta atzerriko beste herrialdeetan dauden edo sortuko diren Elkarteekin ere bai.
- Kideentzako interesekoak diren batzar zientifikoak, sinposioak, hitzaldiak-eta antolatuko ditu, baita truke zientifikoak eta pertsonalak ere.
- Oro har, bere helburuak betetzen laguntzen duten jarduerak garatuko ditu.
III. ATALA. ZUZENDARITZA-ORGANOAK ETA ADMINISTRAZIO-MODUA
6. artikulua Hauek dira Elkarteko zuzendaritza-organoak:
BATZAR NAGUSIA, Elkarteko organo goiena. ZUZENDARITZA-BATZORDEA, kide anitzeko zuzendaritza-organo iraunkorra.
7. artikulua Kide guztiek osatzen dute Batzar Nagusia, eta, era berean, kideen borondatea adierazteko organoa da. Ohikoak eta Ohiz Kanpokoak izan daitezke. Behar bezala deitu eta eratutako Batzar Nagusiak Euskal Urologia Elkartea ordezkatuko du. Batzar Nagusian, Estatutu hauen eta legearen arabera, egiten diren akordioek kide guztiak lotzen dituzte, baita disidenteak eta bertaratu ez direnak ere. Batzar Nagusiak gobernatzeko, administratzeko eta ondasunak antolatzeko ahalmena izango du, baita Estatutuak aldatzeko eta Elkartea desegitea erabakitzeko ere. Kide bakoitzak aukera du Batzarrean beste batek bere burua ordezka dezan. Idatziz jaso beharko du beren-beregi eskuordetzea, eta Elkarteko Lehendakariari zuzendu. Idatzia Batzarraren hasieran emango da.
8. artikulua Ohiko Batzar Nagusia urteko derrigorrezko Batzar zientifikoan egingo da.
9. artikulua Kideen herenak eskatuz gero, Ohiz Kanpoko Batzar Nagusia egingo da. Horretarako, 30 egun lehenago Kideen herenak idatzi bat zuzenduko dio Zuzendaritza-batzordeari, eta berariaz aipatuko du Batzarra egiteko deialdiaren arrazoia, edo arrazoiak. Batzarrean bakarrik eztabaidatu ahal izango dira gai-zerrendan ageri diren puntuak. Zuzendaritza-batzordeak Ohiz Kanpoko Batzarrak deitu ahal izango ditu, egoki deritzonean.
10. artikulua Elkarteko Batzar Nagusiak, Ohikoak zein Ohiz Kanpokoak, lehen deialdian baliozkoak izango dira, baldin eta botoa emateko eskubidea duten kideen % 35ak bertaratzen badira, ordezkatuak barne. Bigarren deialdian baliozkoak izango dira, kideen kopurua gorabehera. Batzar Nagusirako deialdia pertsonala izango da, Gai-zerrenda zehaztuko da, eta deialdia, gutxienez, batzarra egin baino 15 egun lehenago egingo da. Deialdian, bigarren deialdiaren eguna eta ordua adieraziko dira.
11. artikulua Akordio guztiak gehiengoz egingo dira, Elkartea desegitekoa eta Estatutuak aldatzekoak izan ezik.
12. artikulua Batzar Nagusiari dagokio:
- Eztabaidatzea, eta onartzea, hala badagokio, Zuzendaritza-batzordearen eta Elkartearen aurreko urteko jarduerei buruz Lehendakariak aurkeztutako txostena eta hurrengo urteko proiektua.
- Onartzea, hala badagokio, amaitutako ekitaldiaren diru-sarreren eta gastuen aurrekontuaren likidazioa eta hurrengo urteko plan ekonomikoa.
- Eztabaidatzea eta erabakitzea kideen proposamenak, baldin eta Lehendakariari Batzar Nagusiaren eguna baino 5 egun lehenago idatziz aurkeztu bazaizkio. Epetik kanpo aurkeztutakoak bidera daitezke, aurretik Zuzendaritza-batzordeak onartu baditu. Izapide hori ez da beharrezkoa, norberak lekarkeena azaltzeko.
- Zuzendaritza-batzordea aukeratzea.
- Ezagutzea eta erabakitzea Zuzendaritza-batzordeak hartutako erabakiei eta akordioei lotutako helegiteak.
13. artikulua Batzar Nagusiaren akordioak Akten liburuan jasoko dira. Bertan Lehendakariak eta Elkarteko idazkariak sinatuko dute. Hurrengo Batzar Nagusian irakurri eta onartuko dira.
14. artikulua Hauek osatzen dute Zuzendaritza-batzordea: Lehendakari 1. Lehendakariorde 1. Idazkari 1. Diruzain 1. 3 Batzordekide, Lurralde Historiko bakoitzeko bat.
15. artikulua Zuzendaritza-batzordea derrigorrez urtean behin bilduko da gutxienez, aurretik Idazkariak deitu eta Lehendakariak ontzat eman behar du. Zuzendaritza-batzordea utziko dute arrazoirik gabe hiru araudi-batzarretara ez doazenek.
16. artikulua Elkarteko Batzar Konstituziogilean aukeratuko dira lehen zuzendaritza-batzordeko kideak. Estatutuak onartu eta gero, egokitzat jotako hautagaiak aurkeztuko dira; gutxienez, kideen %10en abala izan beharko dute.
17. artikulua Zuzendaritza-batzordeko kideak bakarrik aukeratu ahal dira kargu berbererako lau urteko agintaldi baterako. Hala ere, kargu desberdinak izan ahal izango dituzte, ondoz ondoko batzordeetan aukeratuz gero.
18. artikulua Sekretupean aukeratuko dira, bertaratutako Kideen botoen gehi ordezkatutako botoen gehiengo soilez. Elkarteko helbide Soziala Lehendakaria bizi den Lurralde Historikoko hiriburuan egongo da.
19. artikulua Elkarteko Lehendakariak funtzioak utziko ditu:
- Zuzendaritza-batzordea aukeratzen den Batzarrean,
- Ohiz Kanpoko Batzarrak gaitasungabetzen badu,
- arrazoiz uko egiten badio. Ezinbestean.
20. artikulua Zuzendaritza-batzordearen akordioak gehiengo soilez egingo dira. Berdinketa badago, Lehendakariaren botoak erabakiko du. Zuzendaritza-batzordeko ezein kidek ezin izango ditu erabaki propioak hartu, aurretik batzordeak eztabaidatu eta bozkatu ezean.
21. artikulua Zuzendaritza-batzordeak atribuzio hauek izango ditu:
- Elkartearen bizitza bultzatuko du, gizarte-helburuak ahalik eta ondoen betez.
- Estatutuen arabera, kideen onarpena edo baja baloratuko du eta Elkarteko Batzar Nagusiak berretsi beharko du.
- Batzar Nagusiko akordioak beteko ditu.
- Batzar Nagusiak deituko ditu, egokia denean eta Estatutu hauen arabera.
- Euskal Urologia Elkarteko baliabide ekonomikoak bildu eta banatuko ditu, urteko aurrekontuak prestatuko ditu eta Batzar Nagusiari kontuak urtero emango dizkio.
- Diplomak eta ohorezko sariak emango dizkie, araututako diren sariak merezi dituzten Elkarteko kideei.
- Harremanak eratuko ditu beste Elkarteekin eta Erakundeekin, Publikoekin zein Pribatuekin.
- Jaraunspenak, legatuak eta dohaintzak onartu edo errefusatuko ditu, eta ondasunen eta zerbitzuen kontratuak burutuko ditu.
- Oro har, behar eta komeni diren kudeaketa eta administrazio guztiak egingo ditu, Elkartearen bizitza eta helburuak ahalik eta ondoen garatzeko.
22. artikulua Ikasturte bakoitza amaitu baino lehen, Zuzendaritza-batzordeak Elkarteko kideei azalduko die aurreikusitako batzar zientifikorako erabilgarri dauden egunak, jasotako proposamenak kontuan hartuta batzarrak koordinatu ahal izateko. Urtero gutxienez batzar BAT egingo da, Lurralde Historikoetako edozein hiriburutan, baina komeni ei da aurretik ezarritako txandakako ordenari jarraitzea. Ekitaldi akademikoak antolatzeko gastuak Elkarteko Diruzaintzaren kargura izango dira. Ekitaldiak Biltzarrak badira, Batzar Betearazlea aukeratuko da, Biltzarra antola dezan, arlo zientifikoari eta ekonomikoari dagokienez. Zuzendaritza-batzordeari aurkeztu beharko dizkio antolaketaren egitasmoa eta dagokion aurrekontua, eraz onar ditzan.
23. artikulua Lehendakariak funtzio hauek izango ditu:
- Batzarreko eta Zuzendaritza-batzordeko saioen buru izango da, baita Elkarteak antolatutako ekitaldi kultural eta zientifikoetan ere, eta horiek guztiak zuzenduko ditu.
- Elkartea ordezkatuko du, Idazkariarekin batera, kanpoko harreman guztietan.
- Idazkariarekin batera, saioen aktak eta Elkartearen bestelako dokumentuak sinatuko ditu.
- Diruzainarekin eta Idazkariarekin batera, ordainketa-aginduak eta dokumentu egokiak sinatuko ditu, banku-kontuak ireki eta itxiko ditu, eta dirua sartu eta fondoak aterako ditu.
- Batzar zientifikoak, administraziokoak eta Zuzendaritza-batzarrekoak sustatuko ditu, eta Idazkariaren bidez deituko ditu.
24. artikulua Lehendakariordeak Lehendakariaren ahalmenak izango ditu, Lehendakaria ez dagoenean. Era berean, Lehendakariak bere esku uzten dituen funtzioak eta ahalmenak erabiliko ditu.
25. artikulua Idazkariak funtzio hauek izango ditu:
- Saioen Aktak egingo ditu.
- Elkartearen izenean bideratutako posta eta bestelako dokumentuak sinatuko ditu.
- Elkarteko kide guztien erregistroaz arduratuko da.
- Elkarteko jarduera guztien berri emango dio Batzarrari, eta egindako jardueren urteko txostena aurkeztuko du.
- Elkarteko programen eta jardueren berri emango die kideei.
- Kide izateko eskariak jaso eta behar bezala jakinaraziko dizkio Zuzendaritza-batzordeari.
- Oro har, Elkarteko administrazio-zuzendaritzaz arduratuko da, Lehendakariaren gainbegiratuarekin.
Azken batean, Idazkaria arduratuko da Zuzendaritza-batzordearen akordioak betetzeaz, eta Elkartea eta bere jarduera antolatzeaz. Zuzendaritza-batzordeak ezarritako mugen barruan beteko du bere lana, eta Elkarteko Lehendakariarekin zuzeneko harremanetan.
26. artikulua Diruzainak funtzio hauek izango ditu:
- Elkarteko kontabilitatea ordenatu, zaindu eta haien erantzulea izango da.
- Kideen esku jarriko du Batzar Nagusian onartze aldera aurkeztu beharreko kontuen egoera.
- Elkarteko fondoak bildu eta zainduko ditu, eta Zuzendaritza-batzordeak beharrezko deritzenen kontabilitate-liburuez arduratuko da.
- Urteko diru-sarreren eta gastuen aurrekontua prestatuko du.
- Oro har, Lehendakariaren esku-hartzearekin, Elkarteko kontabilitateaz arduratuko da.
27. artikulua Batzorde-kideek funtzio hauek izango dituzte:
- Zuzendaritza-batzordeak agindutako funtzio guztiak egingo dituzte. Batzorde-kideetariko batek Elkarteko Ohiko Batzar bakoitzaren antolaketaren ardura izango du.
- Lehendakariari aurkeztuko dizkie herrialde bakoitzeko kideen kezkak edo iradokizunak.
IV. ATALA. KIDEAK
28. artikulua Euskal Urologia Elkarteko Kide Fundatzaileak dira lehen Batzar Nagusia edo Batzar Konstituziogilea eratzen dituzten kide numerario guztiak.
29. artikuluaKide Numerarioak dira, Urologia-espezialitatearen Titulua badute edo BAME prestakuntza-aldian badaude, eta Zuzendaritza-batzordeak proposatuta Batzarrak hala onartzen baditu.30. artikulua Kide ez-numerarioak dira aurreko baldintza bete eta Euskal Autonomia Erkidegotik kanpo lan egiten dutenak. Kide ez-numerarioek hitza dute baina botorik ez, eta ezin dira zuzendaritza-karguetarako hautagaiak izan.
31. artikulua Kide Urgazleak dira Unibertsitate-titulua dutenak edo beste mediku- edo kirurgia-espezialitateetako profesionalak, baldin eta Urologian arreta berezia egiaztatzen badute, hala eskatzen badute eta Zuzendaritza-batzordeak proposatuta Batzarrak hala onartzen baditu.
32. artikulua Euskal Urologia Elkarteak Ohorezko Kideak izenda ditzake Medikuntza Zientzietako pertsonak edo Elkarteko funtzioetan eta jardueretan ekonomikoki edo aktiboki laguntzen duten ongileak. Izendapenak Zuzendaritza-batzordeak proposatu eta Batzar Nagusiak erabakiko ditu.
33. artikulua Kideen betebeharrak:
- Zuzendaritza-batzordeak eta Batzar Nagusiak egindako Estatutuak eta Akordioak beteko dituzte.
- Kideek, antolatuta, Elkartearen helburuak betetzen lagundu behar dute derrigorrez.
- Zuzendaritza-karguak onartu eta beteko dituzte, estatutuen arabera hala aukeratu badituzte, halabeharrez izan ezik.
- Finkatutako urteko kuotak sasoiz ordainduko dituzte.
- Gure espezialitatean jardutean moral zorrotzenenaren arauak beteko dituzte, eta espezialitatea defendatuko dute, espezialitatea anputatzen ahaleginduz gero.
- Idatziz Elkarteko Zuzendaritza-batzordeari jakinaraziko diote espezialitateari lotutako ezein arazo.
- Elkarteari bizilekuaren aldaketen berri emango diote, harremanetan jarraitzeko.
- Elkarteari jakinaraziko diote kide izateari utzi nahi badiote.
34. artikulua Kideen eskubideak
- Espediente pertsonalean kide direla adieraztea.
- Zuzendaritza-batzordeko karguak aukeratzea eta hautagaiak izatea.
- Hitzez eta botoz esku hartzea Batzar Nagusiko deliberamenduetan, kuoten ordainketa egunean izanez gero.
- Elkarteko gainerako kideen izenak edozein momentutan jakitea, eta kontuak eta dokumentu sozialak aztertu ahal izatea, Zuzendaritza-batzordeak horretarako adierazitako egunetan eta denboran.
- Baldin eta akordioak edo ekintzak Elkarteei buruzko Legearen edo Estatutuen kontra badaude, horien aurka jotzea, berrogei egun naturalen epearen barruan, aurka egindako akordioaren edukiaren berri izan duen edo haren berri izateko aukera izan duen egunetik zenbatzen hasita.
- Elkarteak antolatutako ekintza mediko zientifikoetan parte hartzea.
- Diziplina-neurriak hartu baino lehen, idatziz berari entzutea, eta diziplina-neurriak eragiten dituzten arrazoien berri izatea, arrazoi horien oinarria bakarrik izan ahal izango da dituen betebeharrak ez betetzea, kidea den neurrian.
- Kide ez-numerarioek eskubide berberak izango dituzte, baina ez dute hitza, ez botoa, eta ezin dira izan Zuzendaritza-batzordeko hautagaiak.
35. artikulua Zuzendaritza-batzordeak kideak zigor ditzake, Estatutuak edo Batzar Nagusiko edo Zuzendaritza-batzordeko akordioak behin eta berriz hausteagatik. Zigorrak izan daitezke hasi eskubideak behin-behinean kentzetik, eta behin betiko bereiztera arte, 37. artikulutik 39.era bitartekoek aurreikusitakoaren arabera, biak barne. Hori betetzeko, lehendakariak ikerketa bati ekin diezaioke, zigor daitezkeen jokabideak argitzeko. Ekintzak Idazkariak egingo ditu, eta Zuzendaritza-batzordeari neurri egokiak hartzeko proposatuko dizkio. Zuzendaritza-batzordeak du zigorrak ezartzeko ahalmena, aurretik interesatuaren entzutea ere egingo da. Batzar Nagusian, Akordio horren kontra egin daiteke, arrazoitua betiere, eta 34. eta 35. artikuluek aurreikusitakoaren araberako ekintzei kalte egin gabe.
36. artikulua Kidea izateari utziko dio, baldin eta:
- Hiltzen bada.
- Hala eskatzen badu.
- Bi urtez kuotak ordaintzen ez baditu.
- Zuzendaritza-batzordeak kanporatzen badu, halakoren bat gertatuz gero: behin eta berriz era larrian eta nahita betetzen ez baditu Estatutu hauetatik eta Batzar Nagusiak eta Zuzendaritza-batzordeak egindako baliozko akordioetatik etorritako betebeharrak.
37. artikulua Kide bat aurreko artikuluan aipatutako azken kasuan eroriz gero, Lehendakariak Idazkariari agindu diezaioke aurretik eginbide batzuk egin ditzan beharrezko informazioa izateko. Hori gogoan hartuta, Lehendakariak eginbideak artxibatzeko agindu dezake, edo 35. artikuluan aurreikusitako zigor-espedientea edo kide izatea kentzeari buruzko espedientea ireki dezake. Azken kasu horretan, idazkariak gertaerak egiaztatu eta gero, interesatuari idatzi bat emango dio egozten zaizkion karguen berri emateko. 15 eguneko epean, horri erantzun diezaioke bere defentsan egokitzat jotzen duena aipatuta. Epe hori amaitu eta gero, Zuzendaritza-batzordeko lehen saiora igaroko da, eta egokitzat jotzen duena ebatziko du, batzordekideen bi herenen quorumarekin.
38. artikulua Kide-izaera kentzearen ebazpenaren berri emango zaio interesatuari, eta jakinaraziko zaio egiten den lehen Ohiz Kanpoko Batzar Nagusian helegitea aurkez dezakeela. Batzar Nagusia hiru hilabetean deitu ezean, horretarako bakarrik deitu beharko da. Bien bitartean, Lehendakariak erabaki dezake akusatuari kide den neurrian dituen eskubideak kentzea. Zuzendaritza-batzordekoa bada, kargutik kentzea agindu dezake.
39. artikulua Kide-izatea kentzearen akordioa arrazoitua izango da beti, eta interesatuari jakinarazi behar zaio. Interesatuak Auzitegietara jo dezake, dagokion eskubidea erabiltzeko eta hura Legearen edo Estatutuen kontra dagoela irizten dionean.
V. ATALA. ONDAREA ETA BALIABIDE EKONOMIKOAK.
40. artikulua Elkarteak ez du Sortze Ondasunik. Elkartea mantentzeko baliabide ekonomikoak funtsean Kide Numerarioen kuotek osatzen dituzte. Estatutuak era ofizialean onartu eta gero, kuoten zenbatekoa finkatuko da: Zuzendaritza-batzordeak proposatu eta Batzar Nagusiak onartuko du zenbatekoa. Geroago sar daitezkeen aldaketak Ohiko Batzar Nagusiak onartu behar ditu. Elkarteak beste baliabide ekonomiko batzuk jaso ditzake, jardueran lagundu nahi duten erakunde publikoen edo pribatuen dohaintzen edo ekarpen berezien bidez. Aurreikusitako urteko aurrekontuaren muga BOSTEHUN MILA pezetakoa da, eta Elkartearen beharrizanen arabera aldatuko da.
41. artikulua Kontzeptuengatik lortutako irabazi guztiak Diruzaintza Nagusian sartuko dira.
VI. ATALA. ELKARTEA DESEGITEA.
42. artikulua Elkartea desegin daiteke, baldin eta:
- Agintari eskudunak behin betiko hala ebazten badu, orduan indarrean dagoen Legearen arabera.
- Batzar Nagusiak hala erabakitzen badu. Horretarako, kideen gehiengo absolutuak hala erabaki beharko du Ohiz Kanpoko Batzar Nagusian. Batzar hori Zuzendaritza-batzordeak berez, edo elkarteko kideen erdiak, deitu beharko du horretarako beren-beregi, garaiz eta behar bezala.
43. artikulua Dena delakoagatik, Elkartea desegiten bada, elkartearen ondasunak bere jardute-eremuko Sendagileen Elkarteetako jabegoak izango dira zati berdinetan.
VII. ATALA. ESTATUTUAK ALDATZEA.
44. artikulua Estatutu hauek alda daitezke zati batean edo osorik.
45. artikuluaBatzar Nagusiaren eguna baino bi hilabete lehenago, Estatutuak aldatzeko proposamenak Elkarteko idazkariari bidali behar zaizkio, proposamenak aztertzeko, eta, hala badagokio, bideragarritasunaz hausnartzeko. Zuzendaritza-batzordeak zuzenketak aintzat har ditzan, gutxienez kideen % 25ek babestu beharko dituzte, behar bezala identifikatuak.
46. artikulua Zuzendaritza-batzordeak zuzenketak Batzar Nagusira eramango ditu. Gehiengo osoa behar da zuzenketak onartzeko.
47. artikulua Zuzenketa edo zuzenketak onartu eta gero, kideen artean era nahikoan argitaratu eta zabalduko da, edo dira. Era berean, estatutuen aldaketaren berri emango zaio Agintari eskudunari.
Azken Albisteak
Listado actualizado de socios de la SVU
Estatutos actualizados SVU
Aplazamiento XVII Congreso de la SVU
